ନିମାପଡ଼ା, ୨୯/୯:ଶିକ୍ଷକଙ୍କ ପଦୋନ୍ନତି ପ୍ରକ୍ରିୟାରେ ଓଟିଇଟି (OTET) ଯୋଗ୍ୟତାକୁ ମାପଦଣ୍ଡ କରାଯାଉଥିବାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି କେତେକ ବରିଷ୍ଠ ଶିକ୍ଷକ। ଏହି ପ୍ରସଙ୍ଗରେ ୨୫ରୁ ଊର୍ଦ୍ଧ୍ୱ ଶିକ୍ଷକ-ଶିକ୍ଷୟିତ୍ରୀ ଜିଲ୍ଲା ଶିକ୍ଷା ଅଧିକାରୀଙ୍କୁ ଦାବିପତ୍ର ପ୍ରଦାନ କରିଥିବା ଜଣାପଡ଼ିଛି।
ଶିକ୍ଷକମାନଙ୍କ କହିବା ଅନୁଯାୟୀ, ୨୦୧୧ ମସିହାରେ ଶିକ୍ଷା ଅଧିକାର ଆଇନ ଲାଗୁ ହେବା ପରେ ଶିକ୍ଷକ ନିଯୁକ୍ତି ପାଇଁ ଟିଇଟି ଯୋଗ୍ୟତାକୁ ଗୁରୁତ୍ୱ ଦିଆଯାଇଥିଲା। ପରବର୍ତ୍ତୀ ସମୟରେ ଓଟିଇଟି ଯୋଗ୍ୟତାକୁ ନେଇ ମଧ୍ୟ ବିଭିନ୍ନ ପ୍ରଶାସନିକ ନିର୍ଦ୍ଦେଶ ଜାରି ହୋଇଛି।
ତେବେ, ୨୦୧୧ ପୂର୍ବରୁ ନିଯୁକ୍ତି ପାଇଥିବା ଶିକ୍ଷକଙ୍କ କ୍ଷେତ୍ରରେ ଟିଇଟି/ଓଟିଇଟି ଯୋଗ୍ୟତା ପ୍ରୟୋଗକୁ ନେଇ ଦ୍ୱନ୍ଦ୍ୱ ରହିଥିବା ଶିକ୍ଷକ ସଂଘ ପକ୍ଷରୁ ଦାବି କରାଯାଇଛି। ୨୦୧୯ରେ ପ୍ରକାଶିତ ରାଜ୍ୟ ସରକାରଙ୍କ ଗଜେଟ୍ରେ ଏ ସମ୍ପର୍କିତ ବ୍ୟବସ୍ଥା ଉଲ୍ଲେଖ ଥିବା ସଂଘ ପକ୍ଷରୁ କୁହାଯାଇଛି।
ସଂଘର ଅଭିଯୋଗ ଅନୁଯାୟୀ, ୨୦୨୩ ମସିହାରେ ରାଜ୍ୟର ୧୩ଟି ଜିଲ୍ଲାରେ ଶିକ୍ଷକମାନଙ୍କୁ ଯୋଗ୍ୟତା ଭିତ୍ତିରେ ପଦୋନ୍ନତି ଦିଆଯାଇଥିଲା। ଏହାପରେ ବାଦ ପଡ଼ିଥିବା ୧୭ଟି ଶିକ୍ଷକ ସଂଘ ପକ୍ଷରୁ ଉଚ୍ଚନ୍ୟାୟାଳୟର ଆଶ୍ରୟ ନିଆଯାଇ ଶିକ୍ଷା ବିଭାଗ ବିରୋଧରେ ମାମଲା ରୁଜୁ ହୋଇଥିବା ଦାବି କରାଯାଇଛି। ଫଳରେ ପଦୋନ୍ନତି ପ୍ରକ୍ରିୟା ପ୍ରଭାବିତ ହୋଇଥିବା ଶିକ୍ଷକମାନେ କହିଛନ୍ତି।
ବର୍ତ୍ତମାନ ପୁରୀ ଜିଲ୍ଲା ଶିକ୍ଷା ବିଭାଗର ପଦୋନ୍ନତି ଚୂଡ଼ାନ୍ତ ତାଲିକାକୁ ନେଇ ମଧ୍ୟ ଆପତ୍ତି ଉଠିଛି। ସଂଘର ଅଭିଯୋଗ ଅନୁସାରେ, ତାଲିକାରେ ସ୍ଥାନ ପାଇଥିବା କେତେକ ବରିଷ୍ଠ ଅଣ-ଓଟିଇଟି ଶିକ୍ଷକଙ୍କୁ ବାଦ ଦେଇ ଓଟିଇଟି ଯୋଗ୍ୟତାଧାରୀ ଶିକ୍ଷକଙ୍କୁ ପଦୋନ୍ନତି ଦେବା ପାଇଁ ଅନୁମୋଦନ ପତ୍ର ପ୍ରାଥମିକ ଶିକ୍ଷା ନିର୍ଦ୍ଦେଶକ, ଭୁବନେଶ୍ୱରଙ୍କ ନିକଟକୁ ପଠାଯାଇଛି।
ଏହା ଦ୍ୱାରା ୧୯୯୭ ଓ ୨୦୧୯ କ୍ୟାଡର ରୁଲ୍କୁ ଅଣଦେଖା କରାଯାଉଥିବା ସଂଘ ଅଭିଯୋଗ କରିଛି। ଏହି ପ୍ରସଙ୍ଗରେ ସଂଘର ଜିଲ୍ଲା ସଭାପତି ପୁରୁଷୋତ୍ତମ ପ୍ରଧାନ, ସୁକାନ୍ତ କୁମାର ଭୂୟାଁଙ୍କ ସମେତ ୨୫ରୁ ଊର୍ଦ୍ଧ୍ୱ ଶିକ୍ଷକ-ଶିକ୍ଷୟିତ୍ରୀ ଜିଲ୍ଲା ଶିକ୍ଷା ଅଧିକାରୀଙ୍କୁ ଦାବିପତ୍ର ପ୍ରଦାନ କରିଛନ୍ତି। ଏହାର ନକଲ ପ୍ରାଥମିକ ଶିକ୍ଷା ନିର୍ଦ୍ଦେଶକଙ୍କ ନିକଟକୁ ମଧ୍ୟ ପଠାଯାଇଥିବା ଜଣାପଡ଼ିଛି।
ଶିକ୍ଷକମାନଙ୍କ ଦାବି ହେଉଛି, ପୂର୍ବରୁ ନିଯୁକ୍ତି ପାଇଥିବା ବରିଷ୍ଠ ଶିକ୍ଷକଙ୍କ ସେବା ଅଭିଜ୍ଞତା, ବରିଷ୍ଠତା ଓ ପ୍ରଚଳିତ କ୍ୟାଡର ନିୟମକୁ ବିଚାରକୁ ନେଇ ପଦୋନ୍ନତି ପ୍ରକ୍ରିୟାରେ ନ୍ୟାୟସଙ୍ଗତ ନିଷ୍ପତ୍ତି ନିଆଯାଉ।
ରିପୋର୍ଟ: ବିଭୂତି ଟିଭି | ନିମାପଡ଼ା
Leave a Reply