ଜଗତସିଂହପୁର, ୧୭ ଅଗଷ୍ଟ ୨୦୨୬: ଜଗତସିଂହପୁର ସଦର ଥାନା ପୁଲିସ ପୁରୋହିତପୁର ଅଞ୍ଚଳରେ ଏକ ଭଡ଼ା ଘରେ ଚାଲିଥିବା କଥିତ ସେକ୍ସ ରାକେଟ୍ ଉପରେ ଚଢ଼ାଉ କରିଛି। ଚଢ଼ାଉ ସମୟରେ ପୁଲିସ ୨ ଜଣ ଯୁବତୀଙ୍କୁ ଉଦ୍ଧାର କରିବା ସହ ଅଭିଯୁକ୍ତ ମୁଖ୍ୟ ପରିଚାଳକ ଓ ୩ ଜଣ ଗ୍ରାହକଙ୍କୁ ଗିରଫ କରିଥିବା ସୂଚନା ମିଳିଛି।
ପୁଲିସର ସୂଚନା ଅନୁସାରେ, ପୁରୋହିତପୁର ଅଞ୍ଚଳର ଏକ ଭଡ଼ା ଘରେ ଦୀର୍ଘଦିନ ଧରି ଏହି କଥିତ ଅବୈଧ କାରବାର ଚାଲିଥିବା ନେଇ ସୂଚନା ମିଳିଥିଲା। ନିର୍ଦ୍ଦିଷ୍ଟ ସୂଚନା ଆଧାରରେ ପୁଲିସ ଟିମ୍ ଅଚାନକ ଚଢ଼ାଉ କରିଥିଲା। ତେବେ ଚଢ଼ାଉ ସମୟରେ ୨ ଜଣ ଯୁବକ ଓ ଜଣେ ଯୁବତୀ ଘଟଣାସ୍ଥଳରୁ ଖସି ପଳାଇଥିବା ଜଣାପଡ଼ିଛି।
ପୁଲିସ ତଦନ୍ତରେ ଅଭିଯୁକ୍ତ ମହିଳା କଥିତ ଭାବେ ଏହି କାରବାର ଚଳାଉଥିବା ଏବଂ ବାହାରୁ ଯୁବତୀମାନଙ୍କୁ ଆଣି ଏଥିରେ ସାମିଲ କରୁଥିବା ସୂଚନା ମିଳିଛି। ପ୍ରତ୍ୟେକ ଗ୍ରାହକଙ୍କଠାରୁ ₹୫୦୦ ନିଆଯାଉଥିବା ଏବଂ ଏଥିରୁ ₹୨୦୦ ରଖି ଅବଶିଷ୍ଟ ₹୩୦୦ ସମ୍ପୃକ୍ତ ମହିଳାଙ୍କୁ ଦିଆଯାଉଥିବା ପୁଲିସ ତଦନ୍ତରୁ ଜଣାପଡ଼ିଥିବା କୁହାଯାଇଛି।
ଏସ୍ଡିପିଓ ଦିବ୍ୟରଞ୍ଜନ ନାଥଙ୍କ ସୂଚନା ଅନୁସାରେ, ଅଭିଯୁକ୍ତ ମହିଳାଙ୍କ ଦ୍ୱିତୀୟ ସ୍ୱାମୀ ମଧ୍ୟ ଏହି କାରବାରରେ ସହଯୋଗ କରୁଥିବା ତଦନ୍ତରେ ସାମ୍ନାକୁ ଆସିଛି। ଚଢ଼ାଉ ସମୟରେ ପୁଲିସ ୧୦ଟି ମୋବାଇଲ୍ ଫୋନ୍, ₹୩,୭୫୦ ନଗଦ ଟଙ୍କା, କିଛି ଉତ୍ତେଜକ ଟାବଲେଟ୍ ଓ ଅନ୍ୟାନ୍ୟ ସାମଗ୍ରୀ ଜବତ କରିଛି।
ଜଗତସିଂହପୁର ଜିଲ୍ଲାରେ ଏଭଳି କଥିତ ରାକେଟ୍ ବିରୋଧରେ ଏହା ନିକଟ ଦିନର ଦ୍ୱିତୀୟ ବଡ଼ କାର୍ଯ୍ୟାନୁଷ୍ଠାନ ବୋଲି ପୁଲିସ ପକ୍ଷରୁ କୁହାଯାଇଛି। ଗତ ସପ୍ତାହରେ ତିର୍ତ୍ତୋଲ ପୁଲିସ ରାହାମା ବଜାର ଅଞ୍ଚଳରେ ଚଢ଼ାଉ କରି ସମାନ ଅଭିଯୋଗରେ ୫ ଜଣଙ୍କୁ ଗିରଫ କରିଥିଲା।
ଏଭଳି ଅପରାଧିକ କାର୍ଯ୍ୟକଳାପ ଉପରେ ରୋକ୍ ଲଗାଇବା ପାଇଁ ଜଗତସିଂହପୁର ପୁଲିସ ପକ୍ଷରୁ ‘ଅପରେସନ୍ ଆଶା ଜ୍ୟୋତି’କୁ ଅଧିକ ସକ୍ରିୟ କରାଯାଇଥିବା ଜଣାପଡ଼ିଛି। ଚଢ଼ାଉକାରୀ ଦଳରେ ଆଇଆଇସି ସୁଶାନ୍ତ କୁମାର ସାହୁ, ଅତିରିକ୍ତ ଆଇଆଇସି ତାପସ୍ୱିନୀ କାନୁନଗୋ, ବ୍ରାହ୍ମଣାନନ୍ଦ ପଣ୍ଡା ଓ ପୁଷ୍ପପ୍ରଦେଶ ପ୍ରମୁଖ ସାମିଲ ଥିଲେ।
ଘଟଣାର ଅଧିକ ତଦନ୍ତ ଜାରି ରହିଥିବାବେଳେ ଚଢ଼ାଉ ସମୟରେ ଫେରାର ହୋଇଥିବା ୩ ଜଣଙ୍କୁ ଧରିବା ପାଇଁ ପୁଲିସ ଖୋଜାଖୋଜି ଜାରି ରଖିଛି। ଏହି କଥିତ ରାକେଟ୍ର ପଛରେ ଆଉ କେଉଁମାନଙ୍କ ସମ୍ପୃକ୍ତି ରହିଛି, ସେନେଇ ମଧ୍ୟ ତଦନ୍ତ କରାଯାଉଛି।
— ବିଭୁତି TV | ଜଗତସିଂହପୁର
Leave a Reply