ଭବ୍ୟ ଆୟୋଜନରେ ଉଦ୍ଘାଟିତ ଶ୍ରୀ ଜଗନ୍ନାଥ ଚେତନା ମହୋତ୍ସବ–୨୦୨୬; ସାଧୁସନ୍ଥ, ମଠାଧୀଶ ଓ ଶ୍ରୀମନ୍ଦିର ସେବକଙ୍କ ଉପସ୍ଥିତିରେ ମୁଖରିତ ନିମାପଡ଼ା
ନିମାପଡ଼ା,(BT )୧୧ ଅକ୍ଟୋବର ୨୦୨୬: ମହାପ୍ରଭୁ ଶ୍ରୀ ଜଗନ୍ନାଥଙ୍କ ଅପାର କରୁଣା ଓ ଆଶୀର୍ବାଦରେ ନିମାପଡ଼ା ମାଟି ଆଜି ଧନ୍ୟ ହୋଇଉଠିଛି। ସାଧୁସନ୍ଥ, ମଠାଧୀଶ, ମହନ୍ତ, ଶ୍ରୀମନ୍ଦିରର ବରିଷ୍ଠ ସେବକ, ଆଧ୍ୟାତ୍ମିକ ଚିନ୍ତକ ଓ ସଂସ୍କୃତିପ୍ରେମୀ ଙ୍କ ଭବ୍ୟ ଉପସ୍ଥିତିରେ ଆରମ୍ଭ ହୋଇଛି ଦୁଇଦିନିଆ ଶ୍ରୀ ଜଗନ୍ନାଥ ଚେତନା ମହୋତ୍ସବ–୨୦୨୬। ଆନ୍ତର୍ଜାତୀୟ ଶ୍ରୀ ଜଗନ୍ନାଥ ପ୍ରତିଷ୍ଠାନ (ଭାରତ) ପକ୍ଷରୁ ନିମାପଡ଼ାସ୍ଥିତ ଶହୀଦ ସ୍ମୃତି ଭବନ ପରିସରରେ ଆୟୋଜିତ ଏହି ମହୋତ୍ସବ ଭକ୍ତି, ଆଧ୍ୟାତ୍ମିକତା ଓ ଓଡ଼ିଆ ପରମ୍ପରାର ଏକ ଅନନ୍ୟ ସମାଗମରେ ପରିଣତ ହୋଇଛି।
ମହୋତ୍ସବରେ ପ୍ରତିଷ୍ଠାନର ସଭାପତି ଡ. ଦିଲ୍ଲୀପ କୁମାର ପଟ୍ଟନାୟକ, ମହାନିର୍ଦ୍ଦେଶକ ଡ. ଭାସ୍କର ଚନ୍ଦ୍ର ମିଶ୍ର, ଉପଦେଷ୍ଟା ଶ୍ରୀମତୀ ସୁମିତ୍ରା ଜେନା, ନିର୍ଦ୍ଦେଶକ (ପ୍ରଶାସନ) ଶ୍ରୀ ମନୋଜ କୁମାର ରଥ, ଡ. ପ୍ରଭାତ ରଞ୍ଜନ ମହାପାତ୍ର, ନିର୍ଦ୍ଦେଶକ (ଲୋକସମ୍ପର୍କ) ଶ୍ରୀ ଶ୍ୟାମା ପ୍ରକାଶ ସେନାପତି, ଆଇନଜୀବୀ ଶ୍ରୀ ଦିଲ୍ଲୀପ କୁମାର ନନ୍ଦ, ଶ୍ରୀ ସଂଗ୍ରାମ କୁମାର ପଟ୍ଟନାୟକ, ଶ୍ରୀ ବ୍ରଜକିଶୋର ଦାସ, ଶ୍ରୀ ନନ୍ଦକିଶୋର ଜେନା ଓ ପ୍ରଫେସର ଡ. ଜଗବନ୍ଧୁ ମିଶ୍ର ପ୍ରମୁଖ ଉପସ୍ଥିତ ଥିଲେ।
ଏଥିସହ ଜୟ କିରଣ ଟ୍ରଷ୍ଟ ଓ ସେଲ୍ଫ ଏମ୍ପାୱାରମେଣ୍ଟ ଗ୍ରୁପ୍ର ସଭାପତି ଶ୍ରୀ ଦୀପକ କୁମାର ସାହୁ ଏବଂ ଉପସଭାପତି ଶ୍ରୀ ସୁଦର୍ଶନ ପ୍ରଧାନଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ମହୋତ୍ସବରେ ଯୋଗଦେଇଥିଲେ।
ସାଧୁସନ୍ଥଙ୍କ ପାଦ ପ୍ରକ୍ଷାଳନରୁ ଭବ୍ୟ ଶୋଭାଯାତ୍ରା
ମହୋତ୍ସବର ଆରମ୍ଭରେ ଜୟଗୁରୁ ଆଶ୍ରମଠାରେ ଆଗମନ କରିଥିବା ସାଧୁସନ୍ଥ ଓ ମଠାଧୀଶମାନଙ୍କୁ ପାରମ୍ପରିକ ରୀତିରେ ପାଦ ପ୍ରକ୍ଷାଳନ କରିବା ସହ ପଇଡ଼ ପାଣି ଦେଇ ଭକ୍ତିପୂର୍ଣ୍ଣ ସ୍ୱାଗତ କରାଯାଇଥିଲା। ପରେ ଦୋଳମଣ୍ଡପ ଛକଠାରୁ ଏକ ବିଶାଳ ଓ ଆକର୍ଷଣୀୟ ଶୋଭାଯାତ୍ରା ଆରମ୍ଭ ହୋଇଥିଲା।
ଶୋଭାଯାତ୍ରାରେ ୨୦ ଜଣିଆ ଶଙ୍ଖୁଆ ଓ କାହାଳିଆ ଦଳ, ୪୬ଟି ମଣ୍ଡଳୀୟ ସଂକୀର୍ତ୍ତନ ଦଳ, ନାଗାନାଚ, ଘୋଡ଼ାନାଚ, ଓଡ଼ିଶୀ, ଗୋଟିପୁଅ ଓ ଦେବଦାସୀ ନୃତ୍ୟ ଆଦି ପାରମ୍ପରିକ କଳା ପରିବେଷିତ ହୋଇଥିଲା। ଶଙ୍ଖଧ୍ୱନି, କାହାଳିର ଗମ୍ଭୀର ନାଦ, ସଂକୀର୍ତ୍ତନ ଓ ବେଦଧ୍ୱନିରେ ନିମାପଡ଼ାର ପରିବେଶ ଭକ୍ତିମୟ ହୋଇଉଠିଥିଲା। ଏହି ଶୋଭାଯାତ୍ରା ଓଡ଼ିଶାର ସମୃଦ୍ଧ ଲୋକକଳା, ପାରମ୍ପରିକ ନୃତ୍ୟ ଓ ଜଗନ୍ନାଥ ସଂସ୍କୃତିର ମହାନତାକୁ ପ୍ରତିଫଳିତ କରିଥିଲା।
ମଠାଧୀଶ ଓ ଶ୍ରୀମନ୍ଦିର ସେବକଙ୍କ ଗରିମାମୟ ଉପସ୍ଥିତି
ଏହି ଆଧ୍ୟାତ୍ମିକ ସମାରୋହରେ ପୁରୀର ବିଭିନ୍ନ ପ୍ରସିଦ୍ଧ ମଠର ମଠାଧୀଶ ଓ ମହନ୍ତମାନେ ଯୋଗଦେଇଥିଲେ। ସେମାନଙ୍କ ମଧ୍ୟରେ ବଡ଼ ଓଡ଼ିଆ ମଠର ମଠାଧୀଶ ଶ୍ରୀ ବଂଶୀଧର ଦାସ ଗୋସ୍ୱାମୀ, ନେବଳ ଦାସ ମଠର ମହନ୍ତ ଡ. ରାମଚରଣ ଦାସ ମହାରାଜ, ରାଧାବଲ୍ଲଭ ମଠର ମହନ୍ତ ରାମକୃଷ୍ଣ ଦାସ ମହାରାଜ, ମହୀପ୍ରକାଶ ମଠର ମହନ୍ତ ସ୍ୱାମୀ ଶୁଭାନନ୍ଦ ମହାରାଜ, ପାପୁଡ଼ିଆ ମଠର ମହନ୍ତ ରାମକୃଷ୍ଣ ଦାସଜୀ, ଉତ୍ତରପାର୍ଶ୍ୱ ମଠର ମହନ୍ତ ନାରାୟଣ ରାମାନୁଜ ଦାସଜୀ ଏବଂ ହାତୀ ଆଖଡ଼ା ମଠର ମହନ୍ତ ସୁଖରାମ ଦାସଜୀ ପ୍ରମୁଖ ଥିଲେ।
ସେହିପରି ସିଦ୍ଧବକୁଳ ମଠର ମହନ୍ତ ଶ୍ରୀନିବାସ ଦାସଜୀ, ବଡ଼ ସନ୍ଥ ମଠର ମହନ୍ତ ଅଭିରାମ ଦାସଜୀ ଓ ଶ୍ରୀ କୃଷ୍ଣଚନ୍ଦ୍ର ରଥଙ୍କ ସମେତ ଅନ୍ୟାନ୍ୟ ସାଧୁସନ୍ଥ ଓ ଆଧ୍ୟାତ୍ମିକ ବ୍ୟକ୍ତିବିଶେଷ ଏହି ମହୋତ୍ସବର ଶୋଭା ବୃଦ୍ଧି କରିଥିଲେ।
ଶ୍ରୀମନ୍ଦିର ସହ ଜଡ଼ିତ ବରିଷ୍ଠ ସେବକ ଶ୍ରୀ ରାମଚନ୍ଦ୍ର ଦାସ ମହାପାତ୍ର, ଶ୍ରୀ ମାଧବ ଚନ୍ଦ୍ର ପୂଜାପଣ୍ଡା ସାମନ୍ତ, ଶ୍ରୀ ଭଗବାନ ସୁଆର, ଶ୍ରୀ ବିଶ୍ୱନାଥ ସାମନ୍ତରା, ଶ୍ରୀ ହରେକୃଷ୍ଣ ପ୍ରତିହାରୀ ଓ ଶ୍ରୀ ପୂର୍ଣ୍ଣଚନ୍ଦ୍ର ଗୋଛିକାର ପ୍ରମୁଖ ମଧ୍ୟ ଯୋଗଦେଇଥିଲେ। ଏହି ମହାନ ବ୍ୟକ୍ତିତ୍ୱମାନଙ୍କ ଉପସ୍ଥିତି ମହୋତ୍ସବକୁ ଅଧିକ ଗରିମାମୟ କରିଥିଲା।
ମହାପ୍ରଭୁଙ୍କ ରାଜରାଜେଶ୍ୱରୀ ବେଶ ଦର୍ଶନରେ ଭାବବିହ୍ୱଳ ଭକ୍ତ
ମହୋତ୍ସବରେ ଯୋଗଦେଇଥିବା ସାଧୁସନ୍ଥ, ମଠାଧୀଶ, ସେବକ ଓ ଅତିଥିମାନେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ପବିତ୍ର ରାଜରାଜେଶ୍ୱରୀ ବେଶ ଦର୍ଶନ କରି ଭକ୍ତିଭାବରେ ଆପ୍ଲୁତ ହୋଇଥିଲେ। ମହାପ୍ରଭୁଙ୍କ ଦିବ୍ୟ ସାନ୍ନିଧ୍ୟ ଓ ଏହି ଅପୂର୍ବ ଆଧ୍ୟାତ୍ମିକ ପରିବେଶ ଉପସ୍ଥିତ ଶ୍ରଦ୍ଧାଳୁଙ୍କ ମନରେ ଭକ୍ତି, ଶାନ୍ତି ଓ ଆନନ୍ଦର ସଞ୍ଚାର କରିଥିଲା।
ସନ୍ଧ୍ୟାରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ସହ ମହାପ୍ରଭୁଙ୍କ ନିତ୍ୟ ବ୍ୟବହାର୍ଯ୍ୟ ପବିତ୍ର ସାମଗ୍ରୀର ପ୍ରଦର୍ଶନ ଓ ଦର୍ଶନର ବ୍ୟବସ୍ଥା ରହିଥିଲା। ଏହା ମାଧ୍ୟମରେ ଭକ୍ତମାନେ ଶ୍ରୀଜଗନ୍ନାଥଙ୍କ ସେବା, ପରମ୍ପରା ଓ ଧାର୍ମିକ ଜୀବନଧାରା ସମ୍ପର୍କରେ ଅଧିକ ଜାଣିବାର ସୁଯୋଗ ପାଇଥିଲେ।
ସୁସଂଗଠିତ ପରିଚାଳନାରେ ଆୟୋଜକ ଓ ସ୍ୱେଚ୍ଛାସେବୀଙ୍କ ଭୂମିକା
ଏହି ବିଶାଳ ଆୟୋଜନକୁ ଶୃଙ୍ଖଳିତ ଓ ସୁଚାରୁ ଭାବେ ପରିଚାଳନା କରିବାରେ ଶ୍ରୀ ନୃସିଂହ ଚରଣ ମାନସିଂହ, ଶ୍ରୀ ନିରଞ୍ଜନ ପଳତା, ଶ୍ରୀମତୀ ଜୟଶ୍ରୀ ପାତ୍ର ଏବଂ ସେଲ୍ଫ ଏମ୍ପାୱାରମେଣ୍ଟ ଗ୍ରୁପ୍ର ସମସ୍ତ ସଦସ୍ୟ ସକ୍ରିୟ ଭୂମିକା ଗ୍ରହଣ କରିଥିଲେ। ସାଧୁସନ୍ଥଙ୍କ ସ୍ୱାଗତ, ଶୋଭାଯାତ୍ରାର ଆୟୋଜନ, ଅତିଥି ସତ୍କାର ଓ ସମଗ୍ର କାର୍ଯ୍ୟକ୍ରମର ସୁପରିଚାଳନାରେ ଆୟୋଜକ ଓ ସ୍ୱେଚ୍ଛାସେବୀମାନଙ୍କ ଉଦ୍ୟମ ପ୍ରଶଂସନୀୟ ହୋଇଥିଲା।
ଆୟୋଜକମାନଙ୍କ ମତରେ, ଶ୍ରୀ ଜଗନ୍ନାଥ ଚେତନା ମହୋତ୍ସବ କେବଳ ଏକ ଧାର୍ମିକ ସମାରୋହ ନୁହେଁ; ବରଂ ଜଗନ୍ନାଥ ସଂସ୍କୃତିର ପ୍ରଚାରପ୍ରସାର, ସାଧୁସନ୍ଥଙ୍କ ଆଶୀର୍ବାଦ ଲାଭ, ଓଡ଼ିଆ ପାରମ୍ପରିକ କଳାର ସୁରକ୍ଷା ଓ ଆଧ୍ୟାତ୍ମିକ ଚେତନାର ଜାଗରଣ ପାଇଁ ଏକ ମହତ୍ତ୍ୱପୂର୍ଣ୍ଣ ପ୍ରୟାସ।
ଆସନ୍ତାକାଲି, ୧୨ ଅକ୍ଟୋବରରେ ମହୋତ୍ସବର ଦ୍ୱିତୀୟ ଦିବସର କାର୍ଯ୍ୟକ୍ରମ ଜାରି ରହିବ। ଏହି ଅବସରରେ ଅଧିକ ସଂଖ୍ୟାରେ ଭକ୍ତ, ଶ୍ରଦ୍ଧାଳୁ, ଜଗନ୍ନାଥପ୍ରେମୀ ଓ ସଂସ୍କୃତିପ୍ରେମୀ ଯୋଗଦେଇ ମହାପ୍ରଭୁଙ୍କ କୃପା ଲାଭ କରିବା ସହ ଏହି ଆଧ୍ୟାତ୍ମିକ ମହାମିଳନକୁ ସଫଳ କରିବାକୁ ଆୟୋଜକମାନଙ୍କ ପକ୍ଷରୁ ଆହ୍ୱାନ ଦିଆଯାଇଛି।
ଜୟ ଜଗନ୍ନାଥ।
Leave a Reply