ଭୁବନେଶ୍ୱ ର, ୨୨/୯ (ବିଭୂତି ଟିଭି): ଓଡ଼ିଶା ଉପକୂଳ ନିକଟ ମହାନଦୀ ଅଫ୍ସୋର ବେସିନରେ ତୈଳ ଓ ପ୍ରାକୃତିକ ଗ୍ୟାସ ଅନୁସନ୍ଧାନ କ୍ଷେତ୍ରରେ ଏକ ନୂଆ ସମ୍ଭାବନା ସୃଷ୍ଟି ହୋଇଛି। ରାଷ୍ଟ୍ରାୟତ୍ତ ତୈଳ ଓ ପ୍ରାକୃତିକ ଗ୍ୟାସ କମ୍ପାନୀ ONGC ପକ୍ଷରୁ ‘ସମୁଦ୍ର ମନ୍ଥନ’ ଗଭୀର ସମୁଦ୍ର ଅନୁସନ୍ଧାନ ଅଭିଯାନ ଅଧୀନରେ ଖୋଳାଯାଇଥିବା କୂପରେ ପ୍ରାକୃତିକ ଗ୍ୟାସ ଥିବାର ପ୍ରମାଣ ମିଳିଛି।
କୋଣାର୍କ ଉପକୂଳଠାରୁ ପ୍ରାୟ ୪୩ କିଲୋମିଟର ଦୂରରେ ଅବସ୍ଥିତ MN-DW18-1-H-D କୂପରେ ଏହି ସନ୍ଧାନ ମିଳିଥିବା ଜଣାପଡ଼ିଛି। ସେପ୍ଟେମ୍ବର ୧୮ରେ ଏହି କୂପରେ ଗ୍ୟାସ୍ ଥିବାର ପ୍ରମାଣ ମିଳିବା ପରେ ପ୍ରାଥମିକ ପରୀକ୍ଷଣ କରାଯାଇଥିଲା।
୧,୬୨୩ ମିଟର ଗଭୀର କୂପରେ ଗ୍ୟାସ୍
ONGCର ସୂଚନା ଅନୁଯାୟୀ, କୂପଟିର ମୋଟ ଗଭୀରତା ୧,୬୨୩ ମିଟର। ଏଥିରୁ ୧,୪୪୧ରୁ ୧,୪୫୨ ମିଟର ଗଭୀରତା ମଧ୍ୟରେ ଗ୍ୟାସ୍ ଥିବାର ସଙ୍କେତ ମିଳିଛି। କୂପର ପରୀକ୍ଷଣ ପରେ ଗ୍ୟାସ୍ ପ୍ରବାହ ଆରମ୍ଭ ହୋଇଥିବା ବେଳେ ପ୍ରାରମ୍ଭିକ ପରୀକ୍ଷଣରେ ଗ୍ୟାସ୍ ପ୍ରବାହ ଓ ରିଜର୍ଭୟାର ପ୍ରେସର ଉତ୍ସାହଜନକ ଥିବା ONGC ପକ୍ଷରୁ କୁହାଯାଇଛି।
ଏହି କୂପର ଖନନ କାର୍ଯ୍ୟ ଚଳିତ ବର୍ଷ ଜୁଲାଇ ୨୫ରେ ଆରମ୍ଭ ହୋଇଥିଲା।
ମହାନଦୀ ଅଫ୍ସୋରରେ ବଢ଼ିଲା ଆଶା
ମହାନଦୀ ଅଫ୍ସୋର ବେସିନରେ ଏହି ସନ୍ଧାନକୁ ଗଭୀର ସମୁଦ୍ର ଅନୁସନ୍ଧାନ ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି। ଏହି ଅଞ୍ଚଳରେ ONGC ପୂର୍ବରୁ ‘ଉତ୍କଳ’ ଓ ‘କୋଣାର୍କ’ ନାମରେ ହାଇଡ୍ରୋକାର୍ବନ୍ ସନ୍ଧାନ କରିଛି।
ନୂଆ ଗ୍ୟାସ୍ ସନ୍ଧାନ ପରେ ମହାନଦୀ ଅଫ୍ସୋର ଅଞ୍ଚଳରେ ଆଗାମୀ ଦିନରେ ଅଧିକ ଅନୁସନ୍ଧାନ ଓ ସମ୍ଭାବ୍ୟ ଉତ୍ପାଦନ ନେଇ ଆଶା ବଢ଼ିଛି।
ମନ୍ତ୍ରୀ ହରଦୀପ ସିଂ ପୁରୀଙ୍କ ପ୍ରତିକ୍ରିୟା
କେନ୍ଦ୍ର ତୈଳ ଓ ପ୍ରାକୃତିକ ଗ୍ୟାସ ମନ୍ତ୍ରୀ ହରଦୀପ ସିଂ ପୁରୀ ଏହି ସନ୍ଧାନକୁ ଭାରତର ସମୁଦ୍ରଭିତ୍ତିକ ଶକ୍ତି ଅନ୍ୱେଷଣ କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ବୋଲି ଉଲ୍ଲେଖ କରିଛନ୍ତି।
ତାଙ୍କ ଅନୁସାରେ, ‘ସମୁଦ୍ର ମନ୍ଥନ’ କାର୍ଯ୍ୟକ୍ରମ ଅଧୀନରେ ଭାରତର ଗଭୀର ଓ ଅତି-ଗଭୀର ଜଳରାଶିରେ ନୂଆ ଘରୋଇ ଶକ୍ତି ଉତ୍ସର ଅନ୍ୱେଷଣ ଚାଲିଛି। ମହାନଦୀ ଅଞ୍ଚଳର ଏହି ସନ୍ଧାନଗୁଡ଼ିକ ‘PNG ନିୟମାବଳୀ, ୨୦୨୫’ ଅଧୀନରେ କ୍ଲଷ୍ଟର ବିକାଶର ସମ୍ଭାବନା ମଧ୍ୟ ସୃଷ୍ଟି କରୁଛି।
ବାଣିଜ୍ୟିକ ଉତ୍ପାଦନ ନେଇ ଏବେ ଅପେକ୍ଷା
ତେବେ ଏହି ଗ୍ୟାସ୍ ସନ୍ଧାନରୁ ପ୍ରକୃତରେ କେତେ ପରିମାଣର ଗ୍ୟାସ୍ ମିଳିବ ଏବଂ ଏହା ବାଣିଜ୍ୟିକ ଭାବେ କେତେ ଲାଭଦାୟକ ହେବ, ତାହା ଏବେଠାରୁ ନିଶ୍ଚିତ ହୋଇନାହିଁ। ଏଥିପାଇଁ ଆହୁରି ବିସ୍ତୃତ ମୂଲ୍ୟାଙ୍କନ, ଆପ୍ରେଜାଲ୍ ଓ ପରବର୍ତ୍ତୀ ପରୀକ୍ଷଣ ଆବଶ୍ୟକ।
ମହାନଦୀ ଅଫ୍ସୋରରେ ଗ୍ୟାସ୍ ସନ୍ଧାନ ଓଡ଼ିଶାର ସମୁଦ୍ରଭିତ୍ତିକ ଶକ୍ତି ସମ୍ଭାବନାକୁ ନୂଆ ଦିଗ ଦେବ କି—ଏବେ ନଜର ରହିଛି ପରବର୍ତ୍ତୀ ମୂଲ୍ୟାଙ୍କନ ଉପରେ
Leave a Reply