ଜଗତସିଂହପୁର, ୧୩ ଅଗଷ୍ଟ:
ଜଗତସିଂହପୁର ଜିଲ୍ଲାରେ ₹୩,୦୨,୯୫,୦୦୦ ଟଙ୍କାରୁ ଅଧିକ ସରକାରୀ ପାଣ୍ଠି ଆତ୍ମସାତ ଅଭିଯୋଗରେ ଓଡ଼ିଶା ଭିଜିଲାନ୍ସ ଦୁଇଜଣ ପୂର୍ବତନ ସରକାରୀ ଅଧିକାରୀଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ନୂଆଗାଁ ତହସିଲର ଅବସରପ୍ରାପ୍ତ ଏସ୍ଆର୍ଏ ଭଞ୍ଜ କିଶୋର ବେହେରା ଏବଂ ତିର୍ତ୍ତୋଲ ବ୍ଲକର ପୂର୍ବତନ ପିଇଓ ପ୍ରଦୀପ୍ତ କୁମାର ମଲ୍ଲିକ।
ଭିଜିଲାନ୍ସର ସୂଚନା ଅନୁସାରେ, ୨୦୧୧-୧୨ରୁ ୨୦୨୧-୨୨ ଆର୍ଥିକ ବର୍ଷ ମଧ୍ୟରେ ତିର୍ତ୍ତୋଲ ବ୍ଲକ କାର୍ଯ୍ୟାଳୟରେ ବ୍ୟାପକ ଆର୍ଥିକ ଅନିୟମିତତା ହୋଇଥିବା ତଦନ୍ତରୁ ଜଣାପଡ଼ିଛି। ଏହି ମାମଲାରେ ଭଞ୍ଜ କିଶୋର ବେହେରା, ପ୍ରଦୀପ୍ତ କୁମାର ମଲ୍ଲିକ ଏବଂ ପୂର୍ବତନ ଏଇଇ ସ୍ୱର୍ଗତ ରାଜଦୀପ ହାଂସଦାଙ୍କ ସମ୍ପୃକ୍ତି ଥିବା ଭିଜିଲାନ୍ସ ପକ୍ଷରୁ ଅଭିଯୋଗ କରାଯାଇଛି।
ତଦନ୍ତରେ ସରକାରୀ ଦରମା ରେଜିଷ୍ଟର ଓ ବଣ୍ଟନ ସମ୍ବନ୍ଧୀୟ ଦଲିଲରେ ଜାଲିଆତି ଏବଂ ହେରଫେର କରାଯାଇଥିବା ଅଭିଯୋଗ ସାମ୍ନାକୁ ଆସିଛି। ଅନୁମୋଦିତ ବଜେଟ୍ ଆବଣ୍ଟନଠାରୁ ଅଧିକ ରାଶିର ଜାଲି ଦରମା ବିଲ୍ ପ୍ରସ୍ତୁତ କରି ସରକାରୀ ପାଣ୍ଠି ହେରଫେର କରାଯାଇଥିବା ଏବଂ ଆତ୍ମସାତ ଅର୍ଥ ବ୍ୟକ୍ତିଗତ ସଞ୍ଚୟ ଖାତାକୁ ସ୍ଥାନାନ୍ତର କରାଯାଇଥିବା ଭିଜିଲାନ୍ସ ତଦନ୍ତରେ ଅଭିଯୋଗ ହୋଇଛି।
ଏହି ଘଟଣା ସମ୍ପର୍କରେ ଓଡ଼ିଶା ଭିଜିଲାନ୍ସ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି। ଗିରଫ ଭଞ୍ଜ କିଶୋର ବେହେରା ଓ ପ୍ରଦୀପ୍ତ କୁମାର ମଲ୍ଲିକଙ୍କୁ କଟକସ୍ଥିତ ଭିଜିଲାନ୍ସ କୋର୍ଟକୁ ପଠାଯାଇଛି।
— ବିଭୂତି TV | ଜଗତସିଂହପୁର
Leave a Reply